د.أسيل العوضي والانتخابات

والله كان ودي اكتب عن د. أسيل العوضي من جم يوم، من ما شفت اليوتوب مالها.. أنا شخصياً ماني مقتنع فيها ككفاءة بالمجلس(هذا لا يعني ان عندنا كفاءات أصلاً).. قبل لحد يقول إن ما عندي سالفة او أني ضد المرأة أو من هالكلام، أنا أحترمها كشخص له هدف و تحاول الوصول له.
الحين لازم أبين وجهة نظري. أنا أساساً ضد الأحزاب، و ماني مقتنع انها الحل الأمثل لنا بالكويت. ثانياً، أنا ما أحب اني انتخب شخص يتم قيادته و إدارته من قبل ناس معينين او إن هذا الشخص يتبع قرارات تصدر من ناس على حساب الرضا والقناعة الشخصية، و هذا إللي يصير بالحزب و أقرب مثال على هذا "حدس"...
http://markbna.blogspot.com/2009/04/blog-post.html
هذا لنك مدونة و أعتقد انها وفت و كفت في موضوع أسيل. أفضل فقرة كانت:
"في الفيديو الاخير لها والي نشكر الاخوان على نشرة
قالت ان اخر مرة تواصلت معاكم خلال الانتخابات الماضية
جنها تقول يعني الزبدة بس لما احتاجكم !!! بوصلكم"

في جانب آخر ، أخوي في مدونة حاكي عقالي(بوليد) كتب خوش بوست عن المرشحين و شنو قاعدين يسوون الحين ..
المرشح يقولك إلي تبيه، يسمعك كلام حلو و مصفف بالانتخابات، و يا كثر الوعود اللي يطلقونها و الهجوم على الاسرة الحاكمة يصير حلالي، و لما إتناقشة بموضوع، الأعذار جاهزة و بالمخباه، مثال( والله كنت بقول و اطرح هالشي بالمجلس، بس مثلك عارف ماصار نصيب، إنشالله إذا نجحت؛ او يقولك إن الوضع الاقتصادي والسياسي ما يسمح اناقش مثل هالأمور، ولا يقولك إنه فعلاً طرح هالموضوع لكن كان بس بينة و بين بعض المرشحين او الأعضاء.....)

اتمنى ان الكل يحط مصلحة الكويت جدامة، مانبي الحزبية، ولا القبلية او الطائفية تكون سبب إنتخاب شخص على حساب شخص أكثر كفائه او نزاهة...مانبي والله هذا ولدنا ولا يصير لنا من بعيد... مانبي والله ترى هذا المرشح يمشي معاملاتنا... مانبي هذا المرشح دائماً يتهجم على الاسرة الحاكمة بسبب و من غير سبب(يعني زين)...مانبي المرشح اللي يترزز جدامك ٢٤ ساعة كل يوم بالانتخابات و لين انتخبته ما درى عنك... مانبي اللي ما يتواصل مع أهله، أهل الكويت.. مانبي اللي تسمع صراخة يوم الانتخابات و إذا صار عضو نام لين الانتخابات الياية.. مانبي عضو يدش حافي طرق المعاش، يصير مليونير بيوم و ليلة...مانبي اللي يوزع رشاوي علبوا إنها هدايا(وينه من زمان).. مانبي اللي يشتري أصوات، ترى إضمن هذا اللي شاري صوتك اليوم بفلوس، باكر يبيعك إنت و ديرتك بتراب.. مانبي اللي يدافع عن مصلحتة الشخصية و ينسى الشعب...مانبي اللي يقسم على الدستور، و تالي يطالب بلانقلاب على الدستور(القلاف و ربعة كثر)...مانبي اللي يثير حزازيات و ينسى ان اللي انتخبوه فيهم السني والشيعي والبدوي والحضري والشايب والشاب والناخب والناخبه والغني والفقير...مانبي اللي يقولون الدستور هو المرجع و تالي يطالبون بالكوتة...مانبي اللي يتحاذفون بقلاصات بالمجلس...مانبي اللي يكون عنده مستندات أو أدلة و يقعد يساوم عليهم على حساب الكويت...


مانبي و مانبي و مانبي....ترى ملينا و ملت ديرتنا من خياراتنا...هل يا ترى فيكم أحد رشيد