مسرحيات

يا جماعة ترى ملينا مسرحيات، شالسالفة.. مو عاجبكم بو عدنان ولا سعد ولا باجي الممثلين اللي عندنا؟ مايصير ننافسهم بمجالهم.. يا أخي كل واحد له مجاله و تخصصة..احنا بس لو الله يفكنا من هالحسد اللي ذبحنا جان احنا بخير
اخذوا عندكم،

المسرحية الأولى:

النائب السابق علي الراشد يهدد و يقول"على قولت الشمري في سيف العرب": الكويت تناديني....و ينزل إنتخابات مرة ثانية

المسرحية الثانية:

الصقر يقول بس مابي و تالي حشود تروحلة البيت تبيه يغير راية ، لا و فوق هذا الصحفيين ناطرين عند بيتهم يصورون..(ننطر و نشوف إذا ينزل ولا لأ)

المسرحية الثالثة:

الخرافي يفكر و تالي"مراجع عليا" تسترجيه و تثنيه عن قرار الاعتزال


المسرحية الرابعة(مع اني احترمك يا أخي):

فيصل المسلم يقعدلي جم يوم بالعمرة و الناس تقول نازل، لأ مو نازل، بعدين يطلع بيان يقول فيه أوكي خلاص بنزل..

المسرحية الخامسة:

الجويهل و حركاته ، سحب على شقق و سيارات و عنده فلوس يوزعها على اللي يترشحون..

المسرحية السادسة(هذي مسرحيه حق الصم والبكم):

أعضاء سابقون و مرشحون حاليون صمٌ بكمٌ عميٌ عن كل اللي قاعد يصير من حواليهم من اعتقالات و خرابيط بإسم تطبيق القانون اللي فجأة حكومة تصريف العاجل من الأمور اذكرت إن فيه قانون ..

المسرحية السابعة:

قلاف باشا ياي ،خنت حيلي، من مدينة الضباب و مضحي بصحتة و راحته بس عشانكم يا الشعب(عاد يبين بعينكم، ولا تبونه يكلم أحد من أجداده عشان يدوسون ببطونكم يوم القيامة"استغفر الله من كلامه". لا بعد ترى يايكم من قاعة التشريفات(اللي الخرافي و هو الرئيس يدش المطار حالة حالي)، مع إنه مصرح إنه مع حل مجلس الامة من غير رجعة(ماني قايل غير دستوري لأنه ماكو شي إسمه حل غير دستوري)، لأ و فوق هذا هم قال إن الكويت نادته؟!؟ همممم ، الحين الكويت منو نادت أول، القلاف ولا الراشد؟!؟

بعد تبون مسرحيات..بسكم عاد يالله، ترى مو مقصرة حكومتنا معاكم قاعدة تضّحكم (او تضحك عليكم، كله واحد، حكومة و تمون) بين فترة و فترة بس انتوا الله يسامحكم كله متجهمين و مقلدمين...

قلتوا تبون اكشن، مسيكينة حكومتنا قالت صار، يمكن الشعب متأثر بمسلسل الخطر معاكم، و قامت و سوت حركة حماية حق الفرعيات و جم واحد تلته أمن دولة(علشان الحبكة ، شفيكم ماتعرفون شي)

عموماً ، الموسم المسرحي توة بادي و العروض راح تكون أكثر فكاهة و قوة مع الوقت و لين الحين ما دخلوا الأبطال صالة العرض

لا تنسوون، جميع العروض مجاناً علشان الشعب الكريم مع وجبة عشاء ، واالله ما قصرت حكومتنا..

و الله يخلي الريس، الله يطول عمره

و هذي دعوة يا دلع